Bio

Zwüsched zwei Bühne. Sit 5 Jahr verfolgt de Lucas Martin sini zwei grösste Lideschafte. Musig und Medizin. Wo de Zürcher Oberländer im Früelig 2014 fasch es Jahr Ziit gha het, bis er bi de Ufnahmeprüefige zum Medizinstudium het müese atrabe, isch klar gsi: Es isch de Moment, d’Welt vo de Musig chli z’erkunde. Immerno so überältigt vom Gfühl, wo er bi sinere Maturarbetspräsentation vor eme Jahr s’erste Mal als Sänger uf de Bühne gstande isch, het er die Glegeheit ez wele ergrife.

De Orange New Talent Contest 2014 isch de ideali ersti Prüefstei gsi. Dur sis international Renommee und es Prisgeld vo 10’000 Franke het de Bandwettbewerb in Crans-Montana jedes Jahr Bands us ganz Europa ahglockt. Zäme mit sim Schuelkolleg und Schlagzüger Robin Schläpfer het de Lucas denn e Wuche lang Tag und Nacht d’Strasse vo Züri mit Musig unsicher gmacht und so über 3000 Stimme im Voting chönne sammle. Demit isch de erst Platz und s’Ticket für s’Final am Caprice Festival gsicheret gsi. De Lucas het sich e Gitarre kauft, zum d’Band komplettiere drü wiiteri Schuelkollege iigsammlet und 10 Songs gschribe, dass si au e Stund hend chönne spille am Final. D’Kombination us dere Vorgschicht und em Uftritt hett d’Jury letstendlich überzügt, de Lucas Martin als Gwünner vom Wettbewerb uszzeichne. Mit em Prisgeld isch dänn in Zämearbet mit em Romain Della Valle (Bastian Baker) in Paris di ersti Single “My Ukulele” entstande, weli vor allem i de Romandie i allne grössere Radios gloffe isch und so am Lucas und sinere Band letztendlich Uftritt i de ganze Schwiiz ermöglicht hät.

Nachdem de Lucas sini Lideschaft uf de Konzertbühne immer intensiver het chönne usüebe, het im 2015 mitem Bestah vom Numerus Clausus au die zweiti so sehr gwünschti Bühne druf gwartet, vo ihm betrete z’werde.

Mit de zwei neue Singles „Hip Heart“ (Nov. 19) und „Memory Land“ (Feb. 2020) chunnt er jetzt wieder intensiver id Schwizer Musigszene zrugg. Ab Mitti Jahr wird mer de Lucas zeme mit sinere vierchöpfige Band denn au wieder mit eme neue Live-Programm uf de Bühne ahtreffe. 2020, mir sind ready!